كيف تصبح رئيس الجمهورية بدون معلم ؟؟

من طرف **المدير العام** السبت مارس 27, 2010 1:19 am

كيف تصبح رئيس الجمهورية بدون معلم ؟؟

إن كنت سألت نفسك يوما .. كيف أصبح
محترم فى هذا الوطن .. سيبك من الأخلاق والكلام الفاضي اللى ما بيجبش همه
ده .. أنا قصدى محترم الناس بتخافك مش بتديك على قفاك .. فهمت .. الحمد لله
..
إذن كيف تصبح رجل من رجال الدولة أو
رجل له كلمته فى هذا البلد أو مشهور .. سأخبرك بهذا ، والرزق والصواب عند
الله .. ملحوظة مبدئية : لا تقول الرزق والصواب عند الله وما شابهها ..
ولكن كل الرزق والصواب بيد رئيس الجمهورية ..
* * *

كيف
تصبح صحفيا مشهورا ؟؟
1. عليك بتنزيل خبر فى الجريدة أنك
تستعد حاليا لفضح أكبر عملية فساد فى البلد ..
. حاول الظهور فى وسائل الإعلام .. و تحدث أنك تجمع حاليا
المستندات وستظهر الحقيقة فى خلال شهر .. إذا سألوك من تتهم .. أرفع يديك
لأعلى .. لو أخبرك وزير .. أرف يديك ثانية .. رئيس الوزراء .. أرفع يديك ..
قصدك !!؟؟ .. تروح قايل بسرعة .. أنا مش هقدر أوجه أتهامى دلوقت لغاية ما
أجمع كل المستندات ..
ملحوظة : لو تحدث إليك أحد من الحكومة
فى الهاتف .. أو حتى تم القبض عليك .. قولوهم ما خافوش وحطو فى بطنكو بطيخة
صيفي .. مع إن فى الغالب محدش هيعبرك .. عشان أحنا فى بلد ديمقراطى ..
3. فى يوم نزول الخبر .. تبدأ المقال
.. بأنك كنت تستعد لنشر فضيحة جديدة .. وبدأت تجمع المستندات .. لكنك
تراجعن فى اللحظة الأخيرة لكيلا تتهم الشرفاء فى هذا البلد .. وتكمل المقال
تتحدث عن مبادئك ..
لا تخف من الحملة التى سيشنها عليك بعض
الصحفيين .. من إنك واطى وبعت نفسك للحكومة .. سيبك منهم .. لأن فى نفس
ذات الوقت هتلاقى الأهرام والأخبار والجمورية بيتكلمو عن الصحفى النزيه ..
وهتلاقيهم فتحنلك أحضانهم ، وهتلبس فى واحدة يا أبن المحظوظة ..
أما عن الشعب المصري .. المتابعين
للقصة .. هيتعاطفو معاك ، وهيتكلمو عن العلقة السخنة اللى أنت كلتها .. أو
إن رئيس التحرير ضغط عليك .. و عشان كده أنت روحت جورنال حكومى عشان تبقى
براحتك .. ولا عزاء للى بيفهموا .. وتقدر من مكانك الجديد تكتب مقالات عن
كل اللى هاجمك وتفضحه .. وبرضه الشعب هيبقى معاك .. وهتلاقي واحد بيقول
لصاحبه : أنت عارف كان بيهاجموه ليه .. عشان الراجل ده عنده كل ملفاتهم ..
البلد باظت يا جودعان ..
وممكن ترشق فى برنامج ولا حاجة .. بس
أفتكرنا بس ..

* * *

كيف
تصبح رئيس تحرير جريدة معارضة ؟؟
1. لا تستمع إلى من يقول لك أن الصفحة
الأولى أو الأخيرة ليست من حقك ، وأختار ما يناسبك ..
2. الأخبار الكاذبة أسهل الطرق .. لا
بأس فى خبر عن صحة الرئيس أو خبر عن أولاده الذين تركو المصريين وهربو على
أول طيارة ..
3. مصر ليست بالأهمية التى تظن بها
نفسها .. أجعل هذه حكمتك فى الحياة ..
4. ربي شنبك .. ربي شنبك .. ربي شنبك
..

ولتصبح رئيس تحرير جريدة حكومية ؟؟
الرئيس و رئيس الوزراء والوزراء ملائكة
الله فى أرضه .. كررها منذ أن تدلف إلى السرير حتى تنام ..

* * *

كيف
تصبح عضو مجلس شعب بأقل التكاليف ؟؟
بالطبع لا أقصد هنا الأعضاء من
المعارضة .. لإننا هنا بنتكلم عن اللى ليهم كلمة فى البلد ..
1. قبل ترشيح نفسك لمجلس الشعب .. قم
ببناء عدد من المبانى الخدمية ..ماتخافش مش هتكلف جامد .. أعمل زاوية صغيرة
.. وأى حتة فى المنطقة فاضية .. أفرشها نجيله وأعملها ملعب .. واى حاجة
مشابهة .. وطبعا ده كله عليه يفط .. على الزاوية .. مسجد عبد المقصود الحنش
.. على الملعب الصغير .. مركز شباب الحنش ..
2. أختار شعار قوى يتكلم عن المستقبل
وليس عن الوقت الحالى .. دعونا نربي مستقبل أفضل لأولدنا .. خمس سنوات نصنع
فيهم المستقبل وكل الكلام الحلو ده ..
3. أعمل دورة رمضانية لكرة القدم – على
الملعب اللى أنت عملته - .. دورة الحنش الرمضانية الأولى .. وخلى بالك من
الأولى دى .. لإن معناها إن فى دورات تانية جاية .. وده هيدي للناس إنطباع
إنك كسبان الأنتخابات يعنى كسبان .. وطبعا لازم تحضر الحفل النهائي ..
4. جيب عربية عليها كراتين وجيب ناس من
تبعك يتلمو على العربيه .. ويقعدو يقولو الحقو الحنش بيوزع كراتين فيها
زيت وسكر ومكرونة وملح .. ويصيطوك فى المنطقة .. والعربية تقعد تلف على كل
الدايرة بنفس النظام..
5. طبعا يفط كده مع ناس مظبط معاهم أو
مع ناس وهميين حتى .. كاتبين إنهم بيئيدوك ..
6. أجر شقة حلوة وأكتب عليها يافطة إنه
مقر عبد المقصود الحنش الانتخابي .. مفتوح أربع وعشرون ساعة لعامة الشعب
.. وطبعا إيجار جديد 3 شهور ..
7. وطبعا الملصقات والحاجات الحلوة دى
.. تكون فى كل حتة .. وأمام موقع الأنتخابات يكون هناك مجموعة تبعك .. تصيح
بأسمك .. معاك يا حنش للنهاية .. وسيبك من موضوع 100 جنيه للصوت عشان ده
هيكلف .. وروح يا شيخ وأنت نائب ..

* * *

كيف
تصبح رئيس إتحاد الكورة ؟؟
كن عيل .. أينعم .. يعنى تقعد تقول
كلام ، وماتعملش منه حاجة ..

* * *

كيف
تصبح رجل أعمال ؟؟
1. مص دماء الشعب من الأمور المفيدة
للغاية ويزيد من الطاقة الجسمية ..
2. الأحتكار .. هتتعب فى الأول بس بعد
كده هترتاح عليه ويكيفك ..
3. القروض .. من الأشياء التى تستطيع
الهروب بها خارج البلاد دون أن تصفر الذمارة ..
4. التليفون .. وسيلة أتصالك مع
الحكومة بعد الهرب ليقنعوك لترجع البلد ، ويعطوك نفوذ سياسية .. لاتفوت
الفرصة لو كنت تنوى العودة لمصر .. لأنك إذا عدت لن يكون الاستقبال حارا
كما تريد ..

* * *

كيف
تصبح أبن رئيس الجمهورية الجدع ؟؟
1. لا تظهر نواياك السياسية إن كان ليك
.. بالله عليك خبيها ..
2. أحضر مباريات المنتخب ، وتقافز مع
الأجوان .. وسب اللعيبة الذين يضيعون الأهداف ..
3. البرامج التليفزيونية وسيلة جيدة
لإظهار جدعنتك .. فأستغلها كما يجب ..

* * *

كيف
تصبح مذيع رياضي ؟؟
1. أركب الموجه .. ولا أقصد هنا رياضة
ركوب الأمواج المشهورة .. لكنى أقصد خليك مع الأغلبية ..
2. قلة الأدب محبوبة .. فهى مثل
التوابل القليل منه مفيد .. الكثير منها مضر .. شوية صغيرين كده ..
3. لابد أن تؤكد أنه لا يوجد شئ يهمك
.. ولا ملفات ولا سيديهات ..
4. المذيعون الرياضيون يكرهونك ويحدقو
عليك لإن الجمهور بيحبك .. خلى بالك ..

* * *

كيف تصبح وزيرا ؟؟
1. أى حاجة تحس بيها إنك هتفيد وزارتك
أوعى تعملها .. أوعى .. أعمل عكسها بالظبط ..
2. أتخذ شعار لوزارتك .. مثلا ثروتنا
لوطنا .. وأعمل عكسه بالظبط ..
3. أنت مثال للأخلاق والأنضباط ..
فأعمل عكس كده بالظبط .. ولا بأس بسب الدين فى مجلس الشعب ..

* * *

كيف
تصبح رئيس وزراء ؟؟
إذا قمت بتطبيق الخطوات السابقة لتصبح
وزير .. عليك القيام بعدد من المشاريع التابعة لوزارتك وتسميتها بأسم
الرئيس .. والتأكيد فى كل خطابتك أن الرئيس هو من يوجهك ..
ملحوظة : لو كنت دكتور جامعى أو رئيس
جامعة سابق .. صدقنى فرصتك كبيرة .. أما لو كنت تابع للجيش ففرصتك شبه
معدومة ؛ لأن هذا أشبه بتعيين نائب للرئيس .. آسف ..

* * *

جئنا
للسؤال الأهم والذى كتب من أجله هذا المقال ..
كيف تصبح رئيس جمهورية ؟؟
لتصبح رئيس للجمهورية يجب عليك
الأستعدداد ببرنامج أنتخـ ( بوم .. آاااااااااااااااه .. طاخ .. آى .. آى )
..
لا تحلم .. لا تفكر فى الأمر .. ده أنت
طماع أوى ماتختار أى حاجة من اللى فات .. ( آه .. أاه ) ..